أسامينا

صبّحكم بالخير يا العمّال العماليّة..
صباح الخير يا أهل الخير..
صباح الرياض الجميلة ومدنكم جميعاً.🌷

إيام بتشوف صورة وبتتذكّر إنّه إلها حكاية، وبتحب تشاركها مع الناس.

الشهر الماضي بعمّان، طلب الباريستا أسماء ولادي مشان يكتبلن ياهن على كاسات القهوة ونحن عم ننتظر وصول ست الحبايب بالمطار.
اسمك؟ قالتله، اسمك؟ قال له، وصل لعندي: والمدام؟😎
وأنا هون حسيت بشي مو جاي عبالي كان أحس فيه، إنه بلاها هالفزلكة طيب، يعني لازم تكتب أسامينا مشان فيروز تغنيلنا: بيبقى اسمك يا حبيبي واسمي بينمحا..😅

المهم.. خلال جزء من الثانية تذكرت العشرطعش ألف مرة اللي معاتبة أهلي فيها على إسمي وإنه ما بحب حرف الشين وإنه مو إذا العيلة شي صيادلة شي أطباء بتسمّوا بنتكن هيك.
كل العالم بتقول انه الانسان إله من اسمه نصيب.. إلا أنا كان النصيب للعالم اللي بحياتي من اسمي وكان معناه إلن مو إلي💓.
وفوق اللي أنا فيه من عدم التصالح مع الاسم كان في كارثة سماعيّة متعوب عليها غير شكل بطفولتي تفوق كلّ ما سبق.. إنّه نشأت ببلد بينادوا فيه اسمي بدون الحرف الأخير كمان.😒

ما هانت عليّ مشكلتي إلا لمّا عرفت الاسم التاني اللي كانوا محتارين بينه وبين هاد وحسّكن عينكن تجربوا تسألوني عالعامّ ولّا عالخاصّ عنّه لأنّه الخيال مجرّد الخيال بيكركبني كركبة يا لطيف؛ الاسم اللي كانوا هيفاجئوني فيه مفاجأة العمر “الأفجأ” ويسمّوني ياه!
من بعد ما عرفته رضيت بنصيبي وقلت لحالي: لا معلش كأنه هيك ولا هيك.. اسم أهون من اسم، لو كنت حعيش تسعمية سنة كنت غيرته بس ما محرزين ما دام أقل من مية..

كل هالعصف الذهني بذاكرة عُقدة الاسم كان عَصَف فرد عَصْفة والباريستا مبتسم ابتسامة مشرقة وماسك القلم الفلوماستر مسكة متعوب عليها وعم يستنى أقله إسم السندريلا اللي ما عادت سندريلا من وقت ما اكتشفت انه ما في حكاية بالحياة اسما سندريلا إنما خطة استعملوها الأمهات مشان يقنعوا البنات إنه في حياة وردية وفساتين نفش سماويّة عم تنتظرهن بعد تعزيل المطبخ.

كان مبتسم بسمة ذكّرتني بابتسامة الدكتور بالجامعة الفصل الدراسي الماضي لمّا قال لي: لقد سبقتِ مُحاضر المادة وتفوّقتِ على معلّمك يا شفاء، زادك الله من فضله، فيه شفاءٌ للنّاس، واستطرد: العسل؛ وأنا وقتها عم أحكي بيني وبين حالي لحالي: أيّ عسل يا دكتور الله يصلحك، أي عسل بس! صدّقني: دبس رمّان.. والله دبس رمّان.

وخطرلي سؤال!
إنه كيف الباريستا بتكون بسمته مُقنعة تنسّيك حق هالكاسة اللي بيكون حقها قد حق مطربان نسكافيه جولد وسط؟ كيف بيقدر يخلّيك تدفع وانت مبسوط ومقتنع ومتصالح مع نفسك قبل جيبتك؟ كيف بيحسسك انه والله ما حتندم؟ كيف بدي أقله ما بدي أقلّك اسمي هاد شي خاص وشخصي وخلصنا بقى.🫣😂

المهم..
تشجعت شوي.. مع إنّي أحياناً بخاف من حالي لما بتشجّع شوي.. وبصوت ما بتسمعه نملة قلتله الاسم العظيم “حضرتوكوم”.😌

ولأوّل مرّة بالتاريخ بتلمع عيون حدا لمّا بقول له اسمي لدرجة تخلّيني أتلبّك!
الله يسامحَك! كيف سمعت!
هاد السؤال حيجنّني من سنين إنه يا رب.. كيف وليش هيك حاسة السمع عند الرجال ضعف اللي عنّا تلاتين أربعين خمسين مرّة، أرزاق..

المهم مرة ثانية😅
نزّل الكاسة من إيده! تقول كان مضيّعني ولاقاني!
وسألني أبو ابتسامة ما عادت تتفسّر: شفاء؟😅

وأنا بهديك اللحظة ما بعرف كيف أشرح كيف صرت أدعي إنه ما يترك الشغل اللي بإيده ويبلّش يغنّي: واشرح لها عن حالتي.😂
مدري كيف في مواقف بايخة مدري مُحرجة بالعمر بتحسّ وقتا إنه في موسيقى تصويريّة تشغّلت حواليك خلفيّة للمشهد وما بتقدر تفهم ليش هالموسيقى بالذات هية ملكة الموقف والكواليس!
يوميتها كنت بلشت نظامي أحسّ إنه مطار الملكة علياء كلّه قشّة لفّة تشغّلت فيه موسيقى افتتاحيّة مسلسل “الجوارح” بصوت عالي، بأعلى صوت! وإنه هاد المشهد للعنقاء ما غيرها مع باريستا ستاربكس بشتا ألفين واتنين وعشرين، والختمة أبصر شلون دتصير هاد إذا صارت، بس بتصير، بتصير وبتتصوّر بأحسن العائلات كمان.😂

الصراحة.. أنا أفشل وحدة بإنه أخبّي البسمة أو الضحكة إذا إجت، والكارثة يوميتا إنها ما إجت مجيّة، هجمت هجوم الشتا الله وكيلكن.. جاوبته: نعم.. شفاء!
رفع صوته شوي وبلّش ترحيب وقال: أهلاً وسهلاً أهلاً وسهلاً، هاي أول مرة بشوف حدا على اسم حماتي😎😂

وأنا وقتا ما عرفت أردّ.. بس لاقيتني لا إرادياً عن أقلّه: حقّك عليّ، أنا آسفة.😂

= شو آسفة ما آسفة، تفهمينيش غلط، والله إنّي بحبّها.. والله العظيم بحبّها.🫣😂

الصلاة عالنبي بهديك اللحظة ما ضلّ حدا بالمطار إلا انتبه انه اسم هالزبونة هيك بسبب حماسته اللي حمّستني على اسمي كم ساعة بعدها مو أكتر😂

المهم الأهم والأخيرة، إنه حلف إنه الكاسة ضيافة، بيني وبينكن كانت أهنا كاسة شوكولاته بعيش معها الدور بحياتي، ومن بعدا قررت ما عمري أطلب من عند كوفي بيحرج الزباين وبيسألن عن الأسماء.

وصباحكن شفاء، وأسماء بتحبوّها، وناس بتحبكن شو ما كانت أسماءكن، ومواقف لطيفة بتنطبع بالذاكرة على شكل ضحكة وصورة ودعوة من القلب كلّ القلب، صباح الضحكة والبسمة والشوكولاته، وصباحكن ستّ الحبايب وكلّ الحبايب.

صباحكن نور، وصباحكن إنجاز.✨🪴