جوع

كلُّ بليغٍ فصيح وليس العكس كذلك، هكذا قال المعلّم.
على سيرة البلاغة، إنه كيف هيك في ناس تبارك الرحمن بكلمتين بتقدر تعبّر تعبير بيكفّي ويوفّي عن مشاعر جبّارة قهّارة، إنه هدول العالم أديش كانوا متألّمين ومرهفين وواصلة الأحاسيس معن لذروتها ليعبّروا تعبير حارق خارق يضل من بعدن إيام وسنين.
على فكرة مو قصدي قصيدة ولا بيت شعر ولا حتى شطر ولا قصدي نص أدبي ولا حتى قصة قصيرة. أنا قصدي كلمتين، كلمتين وبس.
عن جد عن جد صارلي كم يوم على بالي أشوف وش أوّل واحد بالتاريخ اختصر وصف الحالة الشعوريّة للإنسان بلحظة الجوع وقال القولة البليغة: الجوع كافر.
يا إلهي أديشه صادق، أديش عرف يوصف بدقّة متناهية، كان نفسي أتعرّف عليه، أسأله عن عصّة القرصة اللي طلّعت منّه هالتعبير العبقري، كيتو ولا عشرتالاف خطوة ولا صيام متقطّع ولا شو مشان الله شو؟ نفسي أقلّه إنه الدنيا فانية تعا نتعشّا وما نتمشّا، نفسي أقله إنه مو كافر وبس، الله وكيلك مُلحد نظامي الجوع.
بالبيوت العادية لما الناس بتحط راسها عالمخدّة لتنام بتبدا تسمع همس حكايا التيتات، بتسمع وشوشات المخطوبين والمخطوبات وهرطقاتن اللي ما بيكونوا مستوعبين لسّا لهلأ إنّا هلوسات، بتسمع مشكّل ملوّن شي بيتصدّق وألف شي ما بيتصدّق، إلّا ببيوت الحلبيّات اللهم صلي عالنبي!
بتسمع صوت خفيف ظريف جاي من المطبخ، صوت ملكي جاي من بعيد، مدري من السقيفة، مدري من قطرميز مية الفرنجي، مدري من قنينة المازهر، صوت رهيب عجيب رتيب حبيب عم يدندن آخر اليوم: أنا الذي نظر الأعمى إلى كِببي! وأشبعت يبرقاتي من به وَجَعُ!
بتعرف شو يعني تكون إمّك حلبيّة؟ ما بتعرف. اش دأشرحلك لأشرحلك. نعيم مُقيم.💓
بتعرف شو يعني كبير العيلة يسألك بعد الغدا: في آخرة؟ كمان ما بتعرف.
طيب بتعرف شو يعني مامونيّة؟ جبنة مشلشلة؟ لا تقول ما بتعرف. خلّيها بالقلب تدبح.🙈
بشرحلكن لاحقًا، هلأ خليني بالتأمّل الكوني يلّي أنا فيه، وخلينا ب: قف لليبارق وفّها التبجيلا.😂
تصبحو على مامونيّة مع ناس بيحبّوكن من القلب وبتحبوّن من صمصومة القلب.