ناس

في ناس بحياتك بتشبه جهاز الرياضة اللي بيشوفك وإنت عم تتنقرش البلاوي وتتعشا التسالي ومو قادر يقلّك: حاجتك بقا يا عيب الشوم عليك.
يمكن بيشبهوا مخدات طقم غرفة الضيوف المتستّتين طول الشهر بمطارحن متل العرايس عالأساكي ومتى ما إجو الضيوف بيصيروا بظرف دقايق شي عم يمسح الأراضي وشي مخنوق ورا الظهور وشي مزَتْوَت بين الرجلين.
في ناس إنت ما شايفن إلا متل كاسات نانتك السماك المصمودين بالبترينة من شي ميتين سنة وبالوراثة جيل بعد جيل تعاملنا معن: ممنوع الإقتراب وممنوع التصوير.
متل غرفة النوم البيضا اللي ما بتشبه صحابا، ومتل غرفة السفرة اللي كنّا مفكّرينها خانقة البيت، وإنها زيادة عدد، وإنها شغلة مشان البريستيج.
هدول الناس للأمانة حلوين كتير، هدول العالم كتّر خيرن إنّن بيقدروا يوم ورا يوم شو ما كان وشو ما صار يشلحوا الوش الحزين ويلبسوا وش مبتسم ومورّد ويكبسوا عالجرح ملح خشن ويقولوا يا رزاق ارزقنا الصبر من جديد.
هدول الأوادم بعمرن ما كانوا شناتي سفر عتيقة أو حرامات شتوية مخباية فوق الخزاين، هدول الساكتين بحياتن ما حيكونوا برواز صورة أو شقفة مغناطيس أبصر مين هداك ياه معلّق عباب البرّاد وما عاد إله لزوم، هدول الناس إنت، إي نعم إنت، بس إنت اللي لهلأ مو فاهم كيف هالدنيا دوائرها عالكل دورة من بعد دورة بتدور.