في إيّام بالعمر بتحسّ فيّا إنّك علقان، إنّك بالصفر! وتحت الصفر!
إنّه النفسية عدم، إنّه الوجع ما له حدود، وإنّه الصبر ما بقى يتحمّل حاله..
وبتسأل حالك: ليش وكيف ولإيمتى..
وإيّام..
بيمرّ اليوم تقيل أد ما حاولت تشغل وقتك، وأد ما جاملت وشفت ناس..
بتحسّ الدنيا مو واسعتك..
وكأنّه الكل مو مكفّيك..
بتشتاق لنغمة الرسالة، لرنّة المكالمة، للصوت اللي روحك بتحبّه.. للضحكة اللي بيدقلّا قلبك ألف دقّة ودقّة.. وللكلمات.. اللي بعمرك ما ملّيت منّا.. ولا كنت بعمرك حتملّ.
بتشتاق لحدا..
راح..
بتشتاق تقلّه: اشتقتلّك..
وتبكي..
تبكي كتير..
لأنّه الروحة ما كانت عادية..
لأنّه صرتوا بعالمين..
ومدري..
كيف بينبعت بيننّا وبينن الحنين..
جعل الله لهم نوراً.
يا ربّ..
علّمنا.. وفهّمنا.. واصرف عنّا الشر.. ورضّينا..
يا ربّ..
نور من عندك.. يقين إنه الجاي أحسن.. إيمان بحكمتك.. وسلام يوسع همومنا ويزيد..
وحدك العالم اللي ما متل علمه علم..
وحدك الحكيم اللي عنده لكلّ أسئلتنا إجابات..
انقلنا من العتمة للنّور..
أنبتنا نباتاً حسناً.. وباركنا
اجعلنا غصن زيتون..
علّمنا بحنانك اللي ما تعلمناه لسّا..
وفَهِّمنا.. ونوّر بصيرتنا.. يا رحمن.
الحمدلله على كل حال.. قدر الله وما شاء فعل.